وبقالنا كتيييييير ...!!...

"الباقي لو سمحت" ... قالها وهو بيقفل تليفونه إللي عمّال يرن ...

(باقي .... باقي إييه؟؟) ...

"باقي ال 100 جنيه اللي اديتهالك يادكتورة.."

(أيوة .. أيوة ... إللي هو كان كام بقى ...؟؟)

رد عليها إسلام مساعدها في الصيدلية <>

ايديتله الباقي ومشي .... وسندت على المكتب وحطت راسها ما بين إيديها ...

< إنتي مش مركزة خالص يادكتورة> .. مردتش على إسلام وغمضت عينيها ....

سرحت في الأغنية إللي كانت بترن على التليفون من شوية ... (مركب ورق في البحر ... والبحر قلبه كبييييييير)

يااااه .. الأغنية دي فكرتها بأيام جميلة أوي ... فكرتها بأيام الكلية ... وأصحابها ..

فكرتها بالبحر ... وأد إيه بقالها كتيير متمشيتش على البحر ... وبقالها كتييير مشافتش أصحابها ....

خلصت الشيفت بتاعها في الصيدلية ... وهي مروحة ... حست إنها مخنوقة شوية فقررت إنها تعدي على البحر وتتمشي عليه ...

وقف عليه وفردت ايديها الاتنين وفتحت صدرها للهوا البااااارد المنعش ... وأخدت نفس عميق كأنها عاوزة تاخد كل الهوا المنعش وتملا بيه صدرها ...

قعدت تمشي ... وتفتكر ... أيام الكلية وكل يوم مع أصحابها يتجمعو ويتمشوا على البحر .. كل واحدة تحكي إللي جواها وفي قلبها ... كانوا شفافين مع بعض ...

كانت بتجمعهم حاجة مشتركة ... وهي حب البحر ... حب القاعدة عليه بالساعات ... يشكوله ويسمعو أمواجه ...يسمعو لهدوئه ويستمتعو بصفائه ...

فاقت على صوت شباب بيعاكسوها ...فمشيت بسرعة ... وفتحت موبايلها وطلعت صورته وقعدت تبصله .. كأنه الحماية ليها ... وقعدت تملّي عيونها منه ... أصله وحشها أوي ...

بقالها كتييير .. مشافتهوش .... قبل مايسافر قالتله أوعى تنساني .. قالها لو نسيتك هبقى نسيت روحي...

قالتله راجع لي؟؟ قالها لو من غيرك مش عايش ..وهرجعلك عشان أعيش ..

قالها نصبر شوية .... قالتله هتفضل معايا

حست إن دموعها غرقت وشها .. مسحت دموعها وحاولت تهدي نفسها فسمعت الدان بيقول الله أكبر .. حي على الصلاة ...

إفتكرت إن بقالها كتيييييير مصلتش في المسجد ومحسيتش إنها في بيت ربنا ...

دخلت ..وإتوضيت وصليت .. ولما سجدت دعت دعاء طويييييييييييييييل ....وكانت كأنها بتحضن الأرض .. وهي بتعيط ...

سلمت من الصلاة ... وهي حاسة بإنها أحسن كتييييير ...

خرجت من المسجد ... وهي مروحة .. عدت على محل ورد جميل ... إفتكرت إنها بقالها كتييييير مجابتش حاجة حلوة لمامتها.....

فجابت لها وردة جميلة ....

وهي فالطريق إفتكرت إنه فاضل يومين على عاشوراا ...

فتحت موبايلها وقررت تبعت وعيد على كل أصحابها من زمان اللي بقالها كتييييير مكلمتهومش ... وعيلتها كماان ...

دخلت البيت .. وباست مامتها وحطيتلها الوردة الحمرا الجميلة في شعرها ...

وسلمت على كل إللي في البيت ...

وقعدت تشرح لأخوها الصغير درس مش فاهمه ...

وكان بقالها كتييييير مقدتش مع اختها ... فقررت الليلة دي تحكي معاها ...

قعدت سمعتها وحكيتلها ... سمعت كل مشاكلها واللي مزعلها .. لحد ماارتاحت ... ولمادخلوا يناموا ... ناديت عليها مامتها ... كانت تعبانة شوية ...فقعد جنبها قريلها سورة يس اللي بتحبها .... وتمسح على شعرها ...

وتعملها مساج لضهرها أصله تاعبها من زمان ... بس هي إللي بقالها كتييير الدنيا واخداها عنهم ....

لما سمعت مامتها بتتألم غصبن عنها قعدت تعيط بهدووء ... وطلبت منها تنام في حضنها ..أصل بقالها كتييييييير منامتش في حضنها وحسيت بالدفا فيه ...

نامت وخليت مامتها تحضنها جامد ... وراحوا في النوم هما الاتنين...

وطلع الصبح ...

ونادت مامتها على أختها عشان تصحيها ... وتقولها صحي أختك ...

دي بقالها كتيييييير منمتش بالشكل ده ...

دخلت أختها تصحيها ...

وتصحيها...

وتصحيها...

ومردتش عليها ...

أصلها كان بقالها كتييير مفارقة الحياة...

ويوم مارجعتلها ... الحياة هي اللي فارقتها ...

...............................

تمت